Dæmdur í fjögurra ára fangelsi fyrir fíkniefnasmygl

Karlmaður á þrítugsaldri var í dag dæmdur í fjögurra ára fangelsi í Héraðsdómi Reykjavíkur fyrir inndlutning á fíkniefnum. Maðurinn reyndi að smygla inn tæpum 3,8 kílóum af amfetamíni til landsins í ferðatösku í byrjun febrúar fyrr á þessu ári en hann var þá að koma með flugi frá París í Frakklandi. Maðurin hefur setið í gæsluvarðhaldi frá því að hann var handtekinn og kemur gæsluvarðhaldið til frádráttar fangelsisdómi hans. Hann á að baki langan sakaferil en á síðustu níu árum hefur maðurinn 12 sinnum fengið dóma fyrir brot gegn almennum hegningarlögum, umferðarlögum og fíkniefnalögum. Maðurinn játaði brot sitt greiðlega fyrir dómi og yfirlæknir á Réttargeðdeildinni að Sogni hefur lýst yfir að ákærði hafi sótt fast að fá aðstoð og meðferð við sínum vanda og sjúkleika, eftir því sem í boði sé á Litla Hrauni. Í dómnum er jafnframt staðfest að ákærði sé í geðlyfjameðferð hjá yfirlækninum. Maðurinn var eins og áður segir dæmdur í fjögurra ára fangelsi og skal auk þess greiða rúma milljón króna í sakakostnað.