Aldursmerkingu á myndum og leikjum breytt

Aldursmerkingar á kvikmyndum, sjónvarpsefni og tölvuleikjum taka breytingum nú um mánaðmótin þegar ný lög um eftirlit með aðgengi barna að þessu efni taka gildi. Framleiðendur og dreifendur munu þá sjálfir merkja efnið á viðeigandi hátt en Barnaverndarstofa sinnir eftirliti vegna þess.

Þann 1. júlí heyrir Kvikmyndaskoðun sögunni til en hún hefur hingað til skoðað myndir sem ætlaðar eru til sýningar eða dreifingar hér á landi. Um leið verður nýtt kerfi tekið í notkun sem gerir ráð fyrir að framleiðendur og útgefendur mynda og tölvuleikja verði ábyrgir fyrir aldursmerkingum.

Samtök myndréttarhafa á Íslandi munu sjá um að innleiða kerfið en fyrirmynd þess er sótt til Hollands. Hallgrímur Kristinsson, framkvæmdastjóri SMÁÍS, segir Hollendinga hafa komið upp kerfi sem barnasálfræðingar og aðrir fagaðilar sem vinni með börn hafi hannað ásamt fræðimönnum. Það hafi reynst gífurlega vel. Hver og einn sem gefi út mynd skrá sig inn á tiltekið vefsetur, svari þar ákveðnum spurningum um efni myndarinnar og út út því komi svo aldursmerking og innihaldslýsing.

Með nýja kerfinu kemur ný aldursflokkun og geta myndir nú verið bannaðar innan sjö ára og átján ára, en þar er miðað við að fólk sé lögráða. Þá verða einnig innihaldslýsingar eða efnisvísar þar sem tilgreint er hvers vegna mynd er bönnuð.

Barnaverndarstofu hefur verið falið fylgjast með því að lögunum sé fylgt. Hallgrímur segir að menn þar á bæ geti beitt sektum og farið fram á að myndir séu endurmerktar. Ef svo fari hafi útgefendur einungis viku til að gera það og það sé gífurlegur kostnaður sem fylgi því að taka t.d. eina DVD-mynd úr hverri einustu hillu í landinu. Þessar breytingar séu mjög til hagsbóta að mati SMÁÍS, bæði vegna aðhalds á markaði og ekki síður fyrir neytendur og foreldra.