Maður á fimmtugsaldri úrskurðaður í sjö daga gæsluvarðhald

Að morgni gamlársdags voru þrjár konur og einn karl handtekin vegna meintra fíkniefnabrota, fannst á þeim lítilræði af fíkniefnum. Manninum var sleppt eftir yfirheyrslur, en ekkert fannst í fórum hans. Við leit á heimilum kvennanna og í bifreið fannst töluvert magn til viðbótar, alls um 100 grömm af hassi og eitthvað af amfetamíni.

Við yfirheyrslur játaði ein konan umtalsverða sölu á fíkniefnum og var í kjölfarið maður á fimmtugsaldri handtekinn, við leit lögreglu í tveimur húsum fundust tæplega 100 grömm af hassi til viðbótar og tæplega milljón í peningum, bæði íslenskum krónum og dollurum. Játaði maðurinn eign efnanna en neitaði sölu.

Það var svo seint í gærkvöldi að maðurinn var úrskurðaður í sjö daga gæsluvarðhald í Héraðsdómi Suðurlands, en konunum var sleppt eftir yfirheyrslur. Rannsókn málsins heldur áfram og beinist að því að upplýsa ætlaða sölu á fíkniefnum í Vestmannaeyjum undanfarna mánuði.