Karlar leita frekar að tilbreytingu

Í sjálfu sér koma niðurstöðurnar mér ekki á óvart. Það er ljóst að fjölskylduábyrgðin er ennþá að mestu á herðum kvenna, sagði Fanný Gunnarsdóttir, formaður Jafnréttisráðs, í samtali við Fréttablaðið, um nýja könnun Gallup á tíðni og ástæðum vinnuskipta karla og kvenna.

Í könnuninni, sem gerð var fyrir Jafnréttisráð, kemur meðal annars fram að heldur fleiri karlar en konur voru að leita sér að starfi eða um 12 prósent karla á móti 8 prósentum kvenna.

Hins vegar var ekki marktækur munur á kynjunum þegar spurt var hvort þátttakendur könnunarinnar hefðu skipt um vinnuveitanda á síðustu tveimur árum.

Þá kemur fram í könnuninni að rétt tæplega tvöfalt fleiri karlar hafa misst fyrri vinnu og um tvöfalt fleiri karlar en konur setja tilbreytingu sem ástæðu vinnuskipta. Ríflegar þrisvar sinnum fleiri konur en karlar nefna fjölskylduábyrgð sem ástæðu fyrir vinnuskiptum á meðan um tvisvar sinnum fleiri karlar en konur skipta um vinnu vegna launa.

Við vitum auðvitað að þessi hefðbundnu kvennastörf eru metin til lægri launa og þegar fjölskylda stendur frammi fyrir því að velja á milli atvinnu og fjölskyldu þá er miklu líklegra að konur dragi við sig að vera úti á vinnumarkaðnum meðan laun þeirra eru lægri en karla, segir Fanný.