Launin hækkuð um 22 þúsund krónur

Vinnumarkaður Starfsmenn IGS fá allt að 22.300 króna launahækkun þegar greitt verður samkvæmt samkomulagi Alþýðusambands Íslands og Samtaka atvinnulífsins frá því í síðustu viku. Umsamdar fimmtán þúsund krónur hafa þau áhrif að taxtar hækka og álag og yfirvinna gefa fleiri krónur.

"Allt þetta fólk fær útreikninga á breyttum launatöflum. Í ljósi þess að þetta fólk hefur ekki notið neins launaskriðs þá munu þessar breytingar skila sér að fullu til þeirra. Við munum sjá launataxta hækka hátt í 22 þúsund út af áhrifum fimmtán þúsund krónanna," segir Kristján Gunnarsson, formaður Starfsgreinasambands Íslands.

Kristján segir að launahækkunin svari þó ekki kröfum starfsmanna IGS. "Þau telja hana engan veginn nægjanlega. Það kemur sterkt fram að þau hafa alltaf verið niðurnjörvuð á taxta og ekkert launaskrið fengið í ár og áraraðir," segir hann og telur að hluti af vandamálinu sé sá að starfsmennirnir séu orðnir langþreyttir á samskiptum við yfirmenn í starfsmannahaldi.

"Það er eins og allt hafi snúist í höndum yfirmannanna í samskiptum við starfsmennina. Stjórnendurnir eru með vindinn í fangið í öllum sínum aðgerðum. Þeir voru til að mynda að taka tíma­stjórnunar­kerfið Time Care í notkun og það mætir gríðarlegri andstöðu. Því er samt rutt yfir starfsmennina án þess að þeir fái rönd við reist," segir hann.

Gunnar Olsen, framkvæmdastjóri IGS, segir að verið sé að innleiða tímastjórnunarkerfið og ekki hafi verið litið svo á að það væri óþægilegt fyrir starfsmenn heldur frekar jákvætt því að þá gefist þeim kostur á að velja sér vinnutíma. Hann kveðst hafa heyrt af andstöðu en reynt að kynna kerfið til að fólk fengi jákvæðari sýn.

Kristján hefur heyrt af því að erlendum starfsmönnum IGS hafi verið hótað. Þetta telur Gunnar að sé með ólíkindum að blaðamenn hlusti á. Vandamálið sé þrískipt: launamálin, órói sem fylgi miklu álagi og aðstöðumál. "Við ætlum að hitta fólkið okkar og reyna að finna einhverjar leiðir til að lægja öldurnar," segir hann.

Jón Karl Ólafsson, forstjóri FL Group, sagði ákveðin vandamál á borðinu sem verði leyst í samningum við starfsmenn.

Búist er við öðru setuverkfalli um næstu helgi verði málið ekki leyst þá.