Heildarafli hefur dregist saman um 460 þúsund tonn

Heildarafli þar sem af er þessu fiskveiðiári hefur dregist saman um 460 þúsund tonn miðað við sama tíma á síðasta fiskveiðiári. Nýjar mælingar á ástandi sjávar við Ísland sýna hins vegar að uppvaxtarskilyrði fyrir sunnan, vestan og norðan land eru með betra móti.

Fiskistofa sendi í dag frá sér bráðabrigðatölur um heildarafla í maímánuði. Í þeim kemur fram að aflinn var nærri 179 þúsund tonn í síðasta mánuði sem er um 37 þúsund tonnum meira en í sama mánuði í fyrra. Aukningun má rekja til aukins botnfisks- og kolmunnafla.

Fiskveiðiárið nær yfir tímabilið 1. september til 31. ágúst næsta ár og þar sem af er þessu fiskveiðiári hafa veiðst um 975 þúsund tonn í heildina. Það er um 460 þúsund lestum minna en á sama tíma í fyrra þegar heildaraflinn nam rúmlega 1,4 milljónum tonna. Ástæður þessa eru einkum minni loðnuafli ár, hann var um 600 þúsund tonn í lok maí í fyrra en aðeins 184 þúsund tonn nú.

Þrátt fyrir þetta berast jákvæð tíðindi frá Hafrannsóknarstofnuninni sem nýverið lauk vorleiðangri sínum þar sem kannað var ástand sjávar. Meginniðurstöðurnar þar voru þær að hiti og selta voru um og yfir meðallagi alls staðar í kringum landið og átumagn var víðast yfir langtímameðaltali. Þetta þýðir að sögn Ástþórs Gíslasonar, leiðangursstjóra í ferðinni, að uppvaxtarskilyrði fyrir seiði eru með betra móti fyrir sunnan, vestan og norðan land.

Ástþór segir þó varhugavert að draga of víðtækar ályktanir af niðurstöðunum varðandi veiðar á næstu árum þar sem fleiri þættir en áta, hitastig og selta hafi áhrif á afkomu nytjastofna. Niðurstöðurnar séu jákvæð merki fyrir afkomu stofnanna en þættir eins og breytt útbreiðslusvæði loðnunnar séu enn órannsakaðir og þá þurfi að fylgjast með þróuninni í sjónum næstu árin til þess að fá frekari hugmyndir um það hvaða áhrif ástandið í sjónum hafi á nytjastofnana.