Hagvöxtur meiri á Norðurlöndunum en á evrusvæðinu

Hagvöxtur er meiri á Norðurlöndunum en að meðaltali í löndum á evrusvæðinu og almennt nokkuð mikill, þótt hann sé hvergi eins mikill og á Íslandi. Þetta kom fram á fundi fjármálaráðherra Norðurlandanna 20. júní síðastliðinn. Hagvaxtarskeið Norðurlandanna má rekja til aukinnar einkaneyslu og hafa efnahagsumsvif aukist í heiminum og fært Norðurlöndunum auknar útflutningstekjur sem treystir undirstöður hagvaxtarins. Atvinnuleysi er minnst á Íslandi en mest í Finnlandi og fer það minnkandi í öllum löndunum. Viðskiptajöfnuður gagnvart útlöndum er jákvæður á öllum Norðurlöndunum að Íslandi undanskildu. Verðbólga fer vaxandi á öllum Norðurlöndunum og er áætluð milli 1,3 og 2,3% ef Ísland er undanskilið.