Ólíklegt að RÚV-frumvarpi verði frestað fram á haust

Formaður menntamálanefndar telur ólíklegt að orðið verði við þeim kröfum stjórnarandstöðunnar að frumvarpið um Ríkisútvarpið verði ekki samþykkt á þessu þingi heldur frestað fram á haust. Þingflokksformaður Vinstri - grænna segir nauðsynlegt að gera það vegna nýrra gagna sem fram hafi komið í málinu.

Fulltrúar Vinstri - grænna og Samfylkingarinnar í menntamálanefnd hafa sent formanni nefndarinnar bréf þar sem farið er fram á að frumvarp til laga um Ríkisútvarpið verði ekki samþykkt á þessu þingi heldur unnið á ný í sumar og svo samþykkt fyrir áramót. Þá vilja þeir að kannað verði sérstaklega möguleika á að Ríkisútvarpið verði gert að sjálfseignarstofnun og hvernig hægt sé að halda öllum kostum hlutafélagsformsins en sneiða af ókostina.

Þá benda þeir einnig á ný gögn í málinu. Ögmundur Jónasson, þingflokksformaður Vinstri - grænna, segir það ýmislegt sem snúi að höfundarrétti og eignum RÚV og réttir útvarpsstjóra eða annarra til að ráðstafa þeim eignum.

Sigurður Kári Kristjánssin, formaður menntamálanefndar, telur litlar líkur á því að afgreiðslu frumvarpsins verði frestað fram á vor. Krafa um það hafi komið í upphafi málsins. Hann hafi alltaf sagt að það væri langskynsamlegast fyrir RÚV, starfsmenn þess, þingið og þjóðina að umræðum um málefni RÚV ljúki núna.

Fundur hefur verið boðaður í menntamálanefnd á morgun. Þar á að fara yfir ýmis atriði. Sigurður Kári segir að stjórnarandstaðan hafi beðið um að aðilar eins og Ríkisendurskoðun og Samkeppniseftirlitið komi fyrir nefndina og hann sjái ekkert því til fyrirstöðu.

Ögmundur bendir á að menn þrástaglist á því að það þurfi að binda enda á óvissutíma hjá starfsfólki RÚV og ljúka málinu en raunin sé sú að starfsfólkið sé á móti lögunum. Allt hnigi því að því að fresta málinu og hann fagni því að það skuli hafa verið fallist á það að taka málið inn í nefnd að nýju og hann voni að það verði gert í alvöru.