Endurgreiða gjöld og veita afslátt vegna stöðugleika í rekstri

Bæjarstjórn Mosfellsbæjar hyggst greiða til baka hluta af gjöldum bæjarbúa til sveitarfélagsins á þessu ári og veita afslátt af dagvistargjöldum út árið. Bæjarstjóri segir þetta gert vegna stöðugleika sem náðst hafi í rekstri sveitarfélagsins.

Samþykkt var á fundi bæjarstjórnar Mosfellsbæjar í gær að endurgreiða íbúum fimmtán prósent af fasteignagjöldum þessa árs. Þá var einnig ákveðið að veita 20 prósenta afslátt af dagvistargjöldum frá 1. maí ásamt því að hækka um sömu prósentu niðurgreiðslur til foreldra sem eru með börn hjá dagforeldrum.

Þetta er gert vegna þess hve miklum rekstrarafgangi bæjarsjóður skilaði í fyrra. Hann nam um 151 milljón en það er 88 milljónum króna meira en áætlanir gerðu ráð fyrir.

Ragnheiður Ríkharðsdóttir, bæjarstjóri í Mosfellsbæ, segir ákvörðunin hafa átt sér nokkurn aðdraganda en nú sé að nást ákveðið jafnvægi í rekstri bæjarins. Bæjarstjórnin hafi velt þessu fyrir sér eftir ársreikninginn 2004 en þá hafi verið ákveðið að bíða og sjá hvort stöðugleiki næðist áfram. Hann sé væntanlega kominn til að vera og því sé eðlilegt að bæjarbúar njóti þess árangurs sem náðst hafi í rekstrarniðurstöðu bæjarfélagsins.

Lítum á dæmi af fjögurra manna fjölskyldu með tvö ung börn, annað hjá dagforeldri og hitt á leikskóla, sem greiðir um hundrað þúsund krónur í fasteignagjöld. Breytingarnar þýða að hún greiðir um 67 þúsund krónum minna til bæjarfélagsins en upphaflega var áætlað á árinu.

Ragnheiður segir endurgreiðsluna á fasteignagjöldum og dagvistunarafsláttinn kosta bæinn um 63 milljónir króna fram til áramóta. Aðspurð hvort ekki sé um að ræða kosningabragð hjá Sjálfstæðisflokknum þar sem stutt sé í kosningar segir Ragnheiður að ársreikningurinn sé afgreiddur á þessum tíma árs og það vilji svo til að það séu kosningar í vor. Fólk verði bara að velta því fyrir sér. Hún vilji skoða þetta í ljósi ársreikningsins sem liggi fyrir og hún vilji óska Mosfellingum til hamingju með þann glaðning sem þeir eigi í vændum.