Í mál gegn æskuvini

Bruce Willis ætlar í mál við æskufélaga sinn vegna fjárkúgunar. Die Hard-stjarnan hefur höfðað mál gegn Bruce DiMattia þar sem sá síðarnefndi hótaði að skrifa bók um leikarann fengi hann ekki greidda 100 þúsund dollara og bíl.

Samkvæmt lögfræðingi Willis vann DiMattia hjá leikaranum í fjögur ár og stal á þeim tíma fjöldanum öllum af ljósmyndum og myndbandsupptökum. DiMattia var rekinn úr starfi og hótaði þá að skrifa bók og birta myndirnar og myndbandsupptökurnar gengi Willis ekki að kröfum hans.

Willis, sem er um þessar mundir að fara að leika í fjórðu myndinni í Die Hard myndaröðinni, hefur farið fram á að eignum hans verði skilað aftur og að DiMattia borgi honum eina milljón dollara í skaðabætur.