Zidane er niðurbrotinn maður

"Samkvæmt innanbúðarmanni okkar hjá Zidane er hann miður sín yfir þessu og niðurbrotin maður," segir Sigurjón Sighvatsson sem frumsýndi nýstárlega heimildarmynd um knattspyrnukappann fyrr á þessu ári.

Fátt hefur vakið jafn mikla athygli rauða spjaldið sem Zidane fékk þegar hann skallaði ítalska varnarjaxlinn Materazzi í úrslitaleik heimsmeistaramótsins í knattspyrnu. Kvikmyndin um Zidane er á margan hátt mjög óvenjuleg en hún gerist á rauntíma, í leik Real Madrid og Villareal. Hið merkilega er að þar fær Frakkinn einnig að líta rauða spjaldið eftir að hafa lent í útistöðum við Quique Alvarez, leikmann Villareal.

"Því verður ekki neitað að þetta atvik í Þýskalandi hefur aukið áhugan á myndinni," útskýrir Sigurjón.,Þrátt fyrir að leika mjög framarlega á vellinum hefur Zidane fengið fjórtán rauð spjöld á ferlinum en Sigurjón segir að sín fyrstu kynni af honum bendi alls ekki til þess að hann sé einhver skapofsamaður. "Þetta er mjög feimin en um leið yfirvegaður maður með mikið keppnisskap," segir Sigurjón og bætir við að Zidane sé ákaflega stoltur af þessari mynd. "Hann hefur gefið okkur loforð um að kynna myndina með okkur í september og ég veit ekki betur en að það standi."