Fjölskylduhefð að halda partí í Viðey

Fjölskylduhefðir eru af ýmsum toga en bræðurnir Ægir og Gísli Eysteinssynir fara ótroðnar slóðir. Í kvöld halda þeir stórt og mikið Viðeyjarpartí fyrir vini og vandamenn sjötta árið í röð. „Fjölskylda okkar hefur rekið Viðeyjarferjuna undanfarin þrettán ár. Eitt sumarið datt okkur bræðrum í hug að halda gott partí í Viðey fyrir vinina og það tókst svo vel að ákveðið var að halda því áfram,“ segir Ægir Þór Eysteinsson, sem er elstur þeirra bræðra.

Í fyrsta partíið mættu ríflega sextíu manns en síðustu tvö ár hafa vel yfir tvö hundruð manns látið sjá sig. „Þegar við vorum farnir að sjá alls konar jeppa og gospabba í partíinu sem við könnuðumst ekkert við ákváðum við að tímabært væri að fara að minnka við okkur aftur. Þess vegna ætlum við að vera strangir í ár og hleypa bara æskilegum aðilum í teitið. Við búumst við svona 150 velvöldum hausum í það heila,“ segir Ægir Þór.

Vatnaskil verða í sögu Viðeyjar­partísins í ár því Ægir býst við að draga sig í hlé frá partíundirbúninginum fljótlega og að yngsti bróðirinn muni þá taka við kyndlinum. „Það er farið að slá í kallinn, maður er að verða þrítugur á næsta ári og svona. En Yngvi Þórir, sem er átján ára, kemur þá bara sterkur inn. Vinir Gísla geta hugsað sér gott til glóðarinnar þá,“ segir Ægir Þór, og á þá við miðbróðurinn sem er 25 ára. „Það hefur reyndar ekki verið vandamál fyrir skonsur að fá aðgang í partíið í gegnum tíðina,“ segir hann og brosir.

Partíin eru haldin í Viðeyjar­naustinu í eyjunni og hefur stemningin verið með eindæmum góð í gegnum árin að sögn þeirra bræðra. „Til að hafa þetta sem einfaldast höfum við boðið upp á skemmtilega rokktónlist en fólkið hefur sjálft komið með djús,“ segir Ægir. Hefð er fyrir því að teitið sé haldið síðustu vikuna fyrir verslunarmannahelgi en í ár var brugðið út af þeirri venju. „Vegna opinberar heimsóknar Andy Kadlec, hins bandaríska og tilfinningaríka vinar okkar, til landsins, var ákveðið að flýta partíinu um viku svo hann geti faðmað kollega sína og vini í Viðey.“