Allir regnbogans litir

Þá er loksins komið sumar. Manni líður pínulítið eins og kálfunum sem er hleypt út á vorin nú þegar sólin er farin að skína. Sumarkjólarnir eru komnir í notkun og litagleðin tekur völdin. Eftir örlítið gráan og svartan vetur er loksins kominn tími til að missa sig í litagleðinni. Litaval manns endurspeglar skapið og því er um að gera að klæðast heiðgulu og bleiku bara til að fá bros á vör.

Undangengin sumur hafa verið einhverjir tveir eða þrír litir algjörlega ríkjandi. Hver man ekki eftir neonlitaæðinu þegar maður var í appelsínugulum skóm og bol í stíl fyrir nokkrum árum síðan? Hræðilegt, og búðirnar voru svo litaglaðar að maður fékk ofbirtu í augum þegar maður labbaði inn.

Nú er öldin önnur ef marka má tískubúðirnar, hvítur er einn af aðallitum sumarsins. Með honum fylgja síðan allir grænir tónar, ferskju­litaður, bleikur og heiðblár. En eins og tískan er núna þá er algjört frjálsræði og það sama gildir í litunum. Það er enginn einn litur meira í tísku en aðrir og höfuðmáli skiptir að blanda litunum rétt saman. Allt er leyfilegt. Njótið þess. Bleikur og rauður er flott samsetning og gull og silfur saman er geggjað.