Safna fé undir fölsku flaggi

Dæmi eru um að svikahrappar hafi hringt í fólk og sagst vera að safna fé til styrktar Fjölskylduhjálp Íslands sem er líknarfélag í þágu þeirra sem minna mega sín í Reykjavík. Svikahrapparnir bjóðast til að koma heim til fólks og sækja féð.

Ásgerður Jóna Flosadóttir, formaður Fjölskylduhjálpar Íslands, segist hafa fengið þrjár ábendingar seinasta mánuðinn um þessa svikastarfsemi. "BM-ráðgjöf sér alfarið um fjársöfnun félagsins með sölu geisladiska og móttöku á styrkjum og það fer allt í gegnum bankakerfið." Ásgerður segir að ef fleiri svona tilkynningar berist muni félagið leggja inn kæru. - sdg