Hefur umsjón með þjóðskrá

 Í gær tóku gildi breytingar á lögum um þjóðskrá. Samkvæmt þeim flyst þjóðskrá frá Hagstofu Íslands og heyrir nú undir dómsmálaráðuneytið. Þá hafa þjóðskrá verið færð aukin verkefni við útgáfu vegabréfa.

"Frumkvæðið að þessari breytingu kemur frá Hagstofunni. Þjóðskráin þykir nú orðið eiga betur samleið með dómsmálaráðuneytinu en Hagstofunni," segir Hallgrímur Snorrason hagstofustjóri.

Þjóðskráin hefur um nokkurt skeið verið rekin sem sérstök skrifstofa innan Hagstofunnar og verður því eins háttað í dómsmálaráðuneytinu. Þá verður skráin áfram til húsa að Borgartúni 24. Engar breytingar verða á starfsliði þjóðskrár við flutninginn.