Keyrir um og býður fólki til Eyja

Árni Johnsen, fyrrverandi þingmaður og athafnaskáld, keyrir um þessar mundir með gítarinn í hendi til stærstu viðskiptavina Ölgerðarinnar Egils Skallagrímssonar og býður þeim á þjóðhátíð í Eyjum sem verður að venju haldin fyrstu helgina í ágúst. Árni hefur löngum verið þekktur fyrir að ná upp réttu stemningunni með gítarnum og hafa tónleikar hans á vinnustöðunum mælst vel fyrir.

Þegar Fréttablaðið náði í skottið á Eyjapeyjanum var í nógu að snúast og Árni á fullu að rúnta á milli staða ásamt Marín Magnúsdóttur framkvæmdastjóra Practical sem skipuleggur viðburðinn.

Að sögn Marínar kom varla neinn annar til greina en Árni. "Hann er eiginlega hálfgert tákn fyrir þjóðhátíðina í Eyjum og því þótti okkur tilvalið að fá hann til liðs við okkur," segir Marín og Árni sló að sjálfsögðu til þegar kallið kom enda annt um sína Heimaey.