Tvö hundruð manna bolti

Rúmlega 200 manns mættu á fótboltavöllinn í Hannover á dögunum til þess að taka þátt í fjölmennasta knattspyrnuleiknum á HM. Hlynur Hallsson myndlistarmaður átti hugmyndina að viðburðinum sem heppnaðist með miklum ágætum.

"Leikar fóru 2-1 fyrir bláa liðinu," útskýrir Hlynur, "rauða liðið skoraði markið sitt úr einu vítaspyrnunni sem var dæmd." Leikurinn fór vel fram en dómarinn hafði vitaskuld í nógu að snúast við að fylgjast með öllum keppendunum. "Þetta var ábyggilega mjög erfitt fyrir hann en fólk var mjög samviskusamt ef hann dæmdi eitthvað undarlega og leiðrétti hann ef svo bar undir." Allt fór fram stórslysalaust nema hvað einn leikmaður tábrotnaði í upphituninni. "Dómarinn rak einn út af og gaf honum rauða spjaldið í fimm mínútur og þá bað hann fólk um að vera ekki að æsa sig um of - sérstaklega vegna yngri leikmannanna," útskýrir Hlynur.

Atburðurinn var liður í samsýningunni Seitenwechsel sem þýski listahópurinn ART IG skipulagði í tenglsum við heimsmeistarakeppnina sem nýlega lauk í Þýskalandi en segja má að gjöringur Hlyns sé til marks um hversu sameinandi fótboltaíþróttin getur verið. "Sumir leikmannanna voru miklir fótboltaáhugamenn sem voru komnir til þess að skora mörk en það var líka hellingur af myndlistarmönnum og fleirum sem fannst bara gaman að fá að taka þátt. Síðan voru krakkar alveg niður í fjögurra ára aldurinn og fjölmargir á aldrinum 10-12 ára. Svo var ein kona um sjötugt sem spilaði með," segir Hlynur.

"Það var mjög flott að fylgjast með leiknum ofan úr stúku," útskýrir listamaðurinn. "Það myndaðist hálfgerð þvaga á vellinum og þegar boltinn fór af stað tók hjörðin á rás á eftir honum. Sumir voru greinilega búnir að ákveða að vera ýmist í sókn eða vörn og sumir lágu bara á vellinum og biðu eftir boltanum."

Hlynur segist sérstaklega ánægður með hversu vel íþróttamenn á svæðinu tóku viðburðinum og mættu vel. Öðrum keppendum fannst líka ótrúlegt tækifæri að fá að spila á FIFA-grasinu sem sett var á völlinn vegna heimsmeistarakeppninnar en mikil fræði búa að baki blessuðu undirlaginu sem keppt er á.

Atburður þessi var einstakur í sinni röð og Hlynur skrásetti hann bæði á myndband og með ljósmyndum sem hann segist ef til vill ætla að sýna á næstunni. Þeir sem misstu af tækifæri til að taka þátt í leiknum fá því vonandi að berja hann augum, þó það verði aðeins af skjá - enda eru jú margir sem láta sér það nægja.- khh