Tæp hálf milljón Kínverja í biðröð

Yfir þrjátíu þúsund kínverskir spilarar skráðu sig í fjölspilunarleikinn Eve Online á fyrstu klukkustundunum eftir að opnað var fyrir prófanir á honum í Kína í fyrradag. Þar að auki eru um 350.000 manns á biðlista eftir að fá að spila leikinn, en áætlað er að fullgerð útgáfa komi út í næsta mánuði.

Það er íslenska tölvuleikjafyrirtækið CCP sem á og rekur leikinn og hafa íbúar annars staðar í heiminum átt kost á að spila hann á evrópskum þjóni seinustu þrjú ár. Þar eru yfir 100.000 spilendur en kínverski leikurinn verður algjörlega aðskildur hinum evrópska.

Eve Online er eini leikurinn sem CCP hefur gefið út og gengur hann mjög vel á heimsvísu. Megintekjur fyrirtækisins eru í dollurum en útgjöld í krónum, og því hafa sveiflur krónunnar gagnvart dollaranum haft mikil áhrif á rekstur þess. Þegar dollarinn var sem lægstur var jafnvel talað um að fyrirtækið flyttist úr landi, en ekki eru uppi áform um það sem stendur segir Hilmar Veigar Pétursson, framkvæmdastjóri CCP. "Á meðan krónan er í stöðugu ástandi er mjög fínt að vera á Íslandi, en það er erfitt að takast á við þessar sveiflur í innlendum kostnaði og þá ber maður óneitanlega aðra kosti saman við það."