Segir fyrirtæki hafa kvartað yfir Visa

"Það er ekkert til í þessum orðum Halldórs og við höfnum þeim alfarið," segir Jóhannes Ingi Kolbeinsson, framkvæmdastjóri Kortaþjónustunnar, vegna ummæla Halldórs Guðbjarnarsonar, forstjóra Visa Ísland, um að húsleit sem gerð var hjá fyrirtækinu í fyrradag eigi upptök sín hjá keppinautnum PBS, sem Kortaþjónustan hefur umsýslu fyrir á Íslandi.

Jóhannes segist vita til þess að einstök fyrirtæki hafi kvartað yfir Visa Ísland til Samkeppniseftirlitsins og telur það geta verið ástæðu rannsóknarinnar nú. "Visa Ísland býður upp á lánastarfsemi á borð við raðgreiðslur sem við gerum ekki. Og þeir neita að veita okkar viðskiptavinum kost á slíkum raðgreiðslum nema þeir færi öll sín viðskipti til sín. Samkvæmt samkeppnislögum er bannað að skilyrða kaup á einu við kaup á öðru og hugsanlega er Samkeppnis­eftirlitið að skoða það út frá kvörtunum fyrirtækja."

Kortaþjónustan selur þjónustu danska fyrirtækisins PBS, sem er í eigu danskra banka og sparisjóða, á Íslandi. PBS hefur verið í samkeppni við Visa Ísland og Kreditkort frá árinu 2002 um færsluhirðingu sem snýst um uppgjör á kortafærslum. Tekið er á móti kortafærslum úr posum fyrirtækja, færslan gerð upp og greitt inn á reikning viðkomandi fyrirtækis. Þóknanir eru síðan ákveðin prósenta af hverri færslu. Visa Ísland og Kreditkort greiða fyrirtækjum um mánaðamót eftir lok kortatímabils og PBS borgar tveim dögum eftir að færslan berst.

Visa Ísland og Kreditkort stunda ekki færsluhirðingu á kortum hvors annars og eru því ekki í samkeppni. Ný lög um fjármálafyrirtæki, sem voru innleidd gegnum EES árið 2002, gerðu PBS kleift að koma inn á íslenskan markað og annast færsluhirðingu vegna korta frá bæði Visa Ísland og Kreditkortum.

Að sögn Jóhannesar hefur Visa Ísland stundað mjög harða samkeppni og sýnt mun harkalegri vinnubrögð en Kreditkort. "Hvar mörkin eru á því hvað er lögmæt, hörð samkeppni og hvað er misnotkun er hugsanlega nú í skoðun hjá Samkeppniseftirlitinu."

Samkeppniseftirlitið gefur ekki upp hvort rannsóknin komi í kjölfar einstakra kvartana eða kæru. Að sögn starfsmanns getur stofnunin tekið slíkar rannsóknir upp að eigin frumkvæði.