Falun Gong liðar vilja bætur frá ríkinu

Þeir Falun Gong liðar sem meinað var að koma til landsins þegar Jiang Zemin, forseti Kína, kom í heimsókn fyrir um þremur árum krefja íslenska ríkið um bætur vegna málsins og vilja fá þann lista yfir Falun Gong iðkendur sem íslensk stjórnvöld höfðu til grundvallar.

Viðræðunefnd Falun Gong við Ísland sendi frá sér yfirlýsingu í morgun þar sem úrskurði umboðsmanns Alþingis frá því í síðasta mánuði er fagnað. Þar komst umboðsmaður að þeirri niðurstöðu að íslenskum stjórnvöldum hefði ekki verið heimilt að biðja Flugleiðir um að banna þekktum Falun Gong iðkendum að fljúga til Íslands í júní 2002, en þeir hugðust vekja athygli á stöðu mannréttindamála í Kína þegar Jiang Zemin, forseti landsins, heimsótti Ísland.

Í yfirlýsingu viðræðunefndarinnar eru aðgerðir íslenskra stjórnvalda harmaðar og vonast til þess að íslensk stjórnvöld greiði þeim Falun Gong liðum sem bannað var að koma hingað til lands bætur vegna málsins. Þá er farið fram á að listi íslenskra stjórnvalda yfir þá Falun Gong liða sem meinað var að ganga um borð í vélar Flugleiða verði afhentur til þess að hægt sé að eyða honum. Það sé rof á friðhelgi einkalífsins og á árás á orðspor fólksins að hafa það á slíkum listum.

Peder Giertsen, talsmaður viðræðunefndarinnar, sagði í samtali við NFS í morgun að hann teldi ólíklegt að farið yrði í mál við íslensku ríkisstjórnina ef ekki yrði orðið við kröfum um bætur. Hann sagði að íslenskum stjórnvöldum yrði á næstunni skrifað bréf vegna málsins og að farið yrði fram á að stjórnvöld greiddu þeim sem ekki fengu að koma til landsins útlagðan kostnað, svo sem flugfargjöld og fyrirframgreidda hótelgistingu. Aðspuður sagðist hann bjartsýnn á að íslensk stjórnvöld yrðu við kröfum Falun Gong en höfðað væri til samvisku þeirra.