Forsetinn skammar ísraelska sendiherrann

Ólafur Ragnar Grímsson forseti lenti í rifrildi við sendiherra Ísraels á Bessastöðum samkvæmt frétt ísraelsks fréttavefs.

Ástæðan var meðferð landamæravarða í Ísrael á forsetafrúnni. Sagt er að fundurinn hafi endað með því að forsetinn vísaði sendiherranum á dyr og skellti hurðum á eftir. "Litrík frásögn og færð í stílinn" - segir forsetaembættið.

Þessi uppákoma varð á Bessastöðum sextánda júní á fundi Miryam Shomrat, sendirherra Ísraels á íslandi og Ólafs Ragnars Grímssonar, forseta. Sendiherran er með aðsetur í Noregi en var staddur hér á landi í tilefni hátíðarhaldanna sautjánda júní - og sést hér mæta á hátíðarfund á Austurvelli í hópi erlendra stjórnarerindreka.

Ísraelska fréttavefsíðan YNETNEWS segir frá því að forsetinn hafi verið önugur og kvartað yfir meðferðinni á eiginkonu sinni, Frú Dorrit Moussaieff í nýlegri heimsókn til Ísraels. Þar töfðu landamæraverðir hana í nokkrar klukkustundir á þeim grundvelli að hún hefði ekki meðferðis ísraelskt vegabréf. Segir svo frá að á Bessastöðum hafi forsetinn skammað ísraelska sendiherrann fyrir þessa framkomu við eiginkonu forsetans og kvartað yfir því að ísraelsríki hafi ekki enn beðist afsökunar á þessu atviki. Í fréttinni er látið að því liggja að forsetinn hafi skyndilega slitið þessum fundi og hafi sendiherranum virst hurð skellt á hæla sér.

Í sendiráði Ísraels í Osló var NFS tjáð að frú Miryam Shomrat sendirherra myndi ekki tjá sig um þessa frétt en fjölmargar aðrar fyrirspurnir hefðu borist. Í utanríkisráðuneytinu íslenska fengust þau svör að þetta mál hefði ekki komið til kasta ráðuneytisins.

Ekki fæst staðfesting á þessari frétt á forsetaskrifstofunni en

Örnólfur Thorsson, forsetaritari segir þó að frásögn ísraelska veffréttamiðilsins sé "litrík - og færð í stílinn." Segir Örnólfur að forsetinn eigi fjölmarga lokaða fundi með sendimönnum erlendra ríkja og ekki sé hefð fyrir því að greina frá innihaldi þeirra enda tveggja manna tal.