Efla á kennslu í fornleifafræði

Sveitarfélagið Skagafjörður og Hólaskóli ákváðu í dag að leggja til stöðu við skólann fyrir fornleifafræðing til að halda áfram Hólarannsókninni og efla kennslu í fornleifafræði.

Samstarfssamningur um fræðimannsstöðuna var undirritaður í Hólaskóla á Hólum í Hjaltadal við opnun sýningar í tilefni af 900 ára afmæli biskupsstólsins.

Í sýningarskápum eru fornleifar sem fundist hafa við Hólarannsóknina, meðal annars prentstafir úr vöggu prentlistar á Íslandi. Ragnheiður Traustadóttir, fornleifafræðingur, hefur stýrt Hólarannsókninni, sem teygt hefur anga sína víða um Skagafjörð, frá upphafi, árið 2002. Henni verður falið að halda rannsókninni áfram og í tengslum við hana annast kennslu í fornleifafræði.

Sýningin stendur í allt sumar og boðið verður upp á leiðsögn um uppgraftarsvæði fornleifafræðinganna eins og fyrri sumur.