Stúdentar ekki sáttir þrátt fyrir hækkun framfærslu

Stúdentar eru alls ekki sáttir við lánakjör sín þrátt fyrir breytingar til hækkunar á framfærslu sem samþykkt hefur verið í stjórn Lánasjóðs íslenskra námsmanna. Framkvæmdastjóri Stúdentaráðs segir óviðunandi að námslán séu undir lágmarkslaunum og atvinnuleysisbótum.

Fulltrúar námsmannahreyfinganna og stjórnvalda í stjórn LÍN, Lánasjóðs íslenskra námsmanna, hafa komist að samkomulagi um 5,9 prósenta hækkun grunnframfærslu námslána. Þá hefur hlutfall af tekjum lánþega sem kemur til skerðingar námslána verið lækkað um tvö prósent.

Stúdentum finnst hins vegar ekki nóg gert að sögn Ásgeirs Runólfssonar, fulltrúa Stúdentaráðs Háskóla Íslands í stjórn LÍN og framkvæmdastjóri SHÍ. Hann segir að til að ná fram umræddri hækkun á grunnframfærslunni þurfi að hækka framfærslugrunn námslánanna um 8,6%. Þar vegi þyngst að húsnæðisliður grunnsins hækki um 20%. Námsmannahreyfingarnar gera því þá kröfu um að hafin verði vinna á vegum LÍN við að skoða forsendur á bak við útreikninga á grunnframfærslunni.

Aðspurður hvort stúdentar hyggist grípa til einhverja aðgerða ef ekki verði farið að kröfum þeirra segir Ásgeir rétt að bíða og sjá hvaða stefnu stjórnmálaflokkarnir hafi varðandi stúdenta og lánakjörin í aðdraganda þingkosninganna á næsta ári.