Einstakur diskur úr Bláa lóninu

Ég fékk þessa hugmynd fyrst fyrir 12 eða 13 árum, að tengja saman tónlist og Bláa lónið, segir plötusnúðurinn Margeir Ingólfsson sem hefur sent frá sér plötuna Blue Lagoon Soundtrack. Ekkert varð úr hugmynd Margeirs í fyrstu en síðustu ár hefur hann nokkrum sinnum spilað sem plötusnúður í Lóninu og þá ákvað hann að endurvekja þessa gömlu hugmynd.

Blue Lagoon Soundtrack myndi líklegast flokkast sem lounge-diskur þó Margeir fallist ekki alveg á það, enda finnst honum flestir lounge-diskar leiðinlegir. Þeir eru allir eins, sándið er svo slípað. Ég vildi forðast það en í staðinn búa til disk sem er svipaður og Bláa lónið, alveg einstakt. Þá er ég ekki bara að tala um lónið sjálft heldur líka náttúruna í kring og orkuverið sem er þarna. Þetta eru allt hlutir sem ég reyndi að nýta mér þegar ég valdi tónlistina á diskinn, segir Margeir.

Tónlistin á disknum kemur úr ýmsum áttum. Þar er meðal annars að finna lög með Daníel Ágústi, Ninu Simone og Petter Winnberg, bassaleikara Hjálma. Elsta lagið er frá 1974 en nýjustu lögin hafa ekki einu sinni verið gefin út, og verða jafnvel aldrei gefin aftur. Margeir valdi tónlistina og bræddi saman svo úr varð skemmtileg heild. En fyrir hverja er platan hugsuð?

Hún er bara hugsuð fyrir unnendur góðrar tónlistar. Það má alveg koma skýrt fram að ég var ekki að gera einhverja túristaplötu eins og fólk gæti haldið. Þetta er einfaldlega flott konsept-plata.