Segja heimastjórn Palestínumanna bera ábyrgðina

Ísraelar segja heimastjórn Palestínumanna, undir forystu Hamas-samtakanna, bera ábyrgð á sjálfsvígsárás sem varð níu manns að bana í Tel Aviv í gær. Herforingjar vilja svara með árás á heimastjórnarsvæðið. Hamas-liðar hafa ekki viljað fordæma árásina í gær og segja hana réttmæta sjálfsvörn.

Sjálfsvígsárásin í gær var sú mannskæðasta í Ísrael í tuttugu mánuði. Auk þeirra níu sem létu lífið særðust fimmtíu. Árásarmaðurinn var áður sagður sextán ára en er nú sagður tuttugu og eins árs. Hann var liðsmaður palestínsku samtakanna Heilagt stríð.

Í gær féll sautján ára Palestínumaður þegar Ísraelsher gerði flugskeytaárás á bæinn Beit Lahiya auk þess sem árás var gerð á meinta bækistöð palestínskra vígamanna í Gaza-borg. Enginn féll í þeirri árás.

Ehud Olmert, forsætisráðherra Ísraels, átti í morgun fund með ráðgjöfum sínum til að ræða hvernig bregðast ætti frekar við árásinni. Lagt var til að heimastjórn Palestínumanna, undir forystu Hamas-liða, yrði gerð ábyrg fyrir árásinni og lýst óvinveitt sem myndi auðvelda Ísraelsmönnum að réttlæta árás gegn heimastjórninni og fulltrúum hennar. Á fundinum var ákveðið að lýsa heimastjórnina ábyrga en árásir ekki heimilaðar.

Hamas-liðar í heimastjórn Palestínumanna hafa ekki viljað fordæma árásina í gær en það hefur Mahmoud Abbas, forseti Palestínumanna, gert. Í morgun sagði innanríkisráðherra í heimastjórninni að Palestínumenn mættu verja sig fyrir ágangi Ísraelsmanna með hvaða hætti. Ísraelar hafa hert stórskotaliðsárásir á norðurhluta Gaza-strandarinnar síðustu vikur. Þeir segja þær svar við fleiri flugskeytaárásum Palestínumanna á ísraelska bæi frá Gaza.

Bandaríkjastjórn fordæmir árásina í gær og segir það hlutverk heimastjórnar Palestínumanna að koma í veg fyrir hryðjuverk. Kofi Annan, framkvæmdastjóri Sameinuðu þjóðanna, hvatti í gær heimastjórnina til að fordæma sjálfsvígsárásir. Hann sagði kvartetinn svokallaða, Bandaríkjamenn og Rússa auk fulltrúa Evrópusambandsins og Sameinuðu þjóðann, ætla að funda um stöðuna fyrir botni Miðjarðarhafs í New York þann 9. maí næstkomandi.