Um 54% þjóðarinnar er hlynnt því að Íslendingar segi upp varnarsamningum við Bandaríkin en tæp 25% eru andvíg. Þetta kemur fram í nýlegri Gallupkönnun sem IMG Gallup vann fyrir Helga Hjörvar, þingmann Samfylkingarinnar.
Helgi Hjörvar fékk IMG Gallup til að vinna könnunina fyrir sig. Spurt var "Ertu hlynntur eða andvígur því að Íslendingar segir upp varnarsamningum við Bandaríkin?" Meirihluti þjóðarinnar eða 53,9% sögðust vera hlynnt uppsögn samningsins. 24,8% sögðust vera andvíg uppsögn samningsins en rúm 21% þátttakenda stendur á sama. Þá voru þátttakendur einnig spurðir um stuðning sinn við stjórnmálaflokka og reyndust stuðningsmenn Vinstri-hreyfingar Græns framboðs hvað hlyntasti uppsögn samningsins en um 82% þeirra sem sögðust styðja Vinstri græna vildu jafnframt segja upp samningnum. Síst var stuðningur við uppsögn samningsins meðal stuðningsmanna Sjálfstæðisflokksins eða rúm 40 prósent. Þá vildu tæp 59% stuðningsmanna Framsóknarflokks segja upp samningnum, tæp 69% stuðningsmanna Frjálslyndra og um 68% stuðningsmanna Samfylkingarinnar.
Helgi hjörvar segir niðurstöður könnunarinnar afgerandi. Hann vill að Íslendingar segir upp varnarsamningi við Bandaríkin þar ekki sé lengur þörf á honum. Ísland eigi að vera tryggt innan Norður Atlandshafsbandalagsins. Helgi segir að í ljósi þess að varnarliðið sé á förum sé ekki nein ástæða til að halda áfram með varnarsamninginn.
Alls tóku 1313 manns á aldrinum 16-75 ára þátt í könnuninni. Könnunin fór fram dagana 25. maí til 6. júní síðastliðinn og var svarhlutfallið 61,1%.
