Stríðið stendur enn yfir

Óveðrinu virðist ekki vera að slota hjá Heather Mills og Paul McCartney þrátt fyrir að þau séu sögð hafa náð samkomulagi.

Fyrirsætan fyrrverandi fékk mikið áfall þegar hún kom í sveitasetur sitt við Sussex og uppgötvaði að fjölskyldumyndir og ómetanleg listaverk eftir meistara á borð við Picasso og Renoir voru horfin. Í fyrstu hélt hún að þarna hefðu verið þjófar á ferð en þegar Mills sá að búið var að breyta um skrár og öryggisnúmer uppgötvaði hún strax hver hafði þarna verið að verki, eiginmaðurinn fyrrverandi Paul McCartney.

Samkvæmt The Sun mun Heather hafa upplýst lögfræðinga sína um málavexti en nánir vinir hjónanna segja að Paul megi ekki fara inní húsið þar til skilnaðurinn væri gengin í gegn. Eins og komið hefur fram í fjölmiðlum á undanförnum mánuðum hefur verið stirt á milli Paul og Heather eftir að fyrirsætan var sögð hafa lekið dómskjölum í fjölmiðla þar sem fram kom að hún sakaði McCartney um heimilisofbeldi og drykkjuskap.

The Sun greinir frá því að McCartney hafi sent fyrrum eiginkonu sinni smáskilaboð og greint henni frá þessu en nánir vinir hjónanna upplýsa í blaðinu að Mills hafi komist í mikið uppnám. „Henni var í raun sama um málverkin en það var brotthvarf fjölskyldumyndanna af þeim og dóttur þeirra Beatrice sem fengu hvað mest á Mills," sagði einn náinn vinur Heather. „Hún trúir því hreinlega ekki að hlutirnir séu í svona miklum hnút," bætti hann við.

Lögreglan hafði samband við öryggisverði McCartney sem staðfestu að þeir hefðu tekið málverkin og ljósmyndirnar. Talsmaður bítilsins fyrrverandi neitaði hins vegar að tjá sig um málið en heimldamenn The Sun segja að Paul hafi talið að öryggisgæslan á sveitasetrinu hafi ekki verið nægileg.