Þorði ekki út úr húsi

Söng- og leikkonan tindilfætta Jessica Simpson þjáðist af víðáttufælni eftir að hún skildi við eiginmann sinn Nick Lachey. Fjölskylda Jessicu óttaðist að hún myndi einangrast því þá sjaldan tókst að draga hana út fyrir hússins dyr fékk hún kvíðaköst.

Vinur fjölskyldunnar segir að eftir skilnaðinn hafi hún haldið sig sífellt meira heima og um skeið hafi hún eingöngu farið út til að fara í vinnu. Þegar hún fékk kvíðaköstin þyrmdi yfir hana, hana svimaði og hún fékk köfnunartilfinningu.

Jessica mun hafa náð sér aftur, þökk sé fjölskyldu hennar og vinum sem stöppuðu í hana stálinu. Sjálfstraustið er komið á sinn stað og Jessica er hrókur alls fagnaðar.