Enginn saknar áramótaávarpsins

„Ég hef ekki orðið var við þann söknuð," segir Páll Magnússon útvarpsstjóri. Í stjórnartíð hans í Efstaleiti hefur hið umdeilda áramótaávarp verið lagt af og þykir sumum það miður.

„Við höfðum þann háttinn á í fyrra að vera ekki með ávarp frá útvarpsstjóra og endurtökum það núna," bætir hann við. „Ef ég verð hins vegar var við að menn sakni þessa ávarps mikið og vilji ólmir fá að heyra skoðanir mínar á gamlárskvöldi er ekki útilokað að við tökum málið upp aftur en annars er áramótaávarpið úr sögunni," segir Páll sem þó flytur landsmönnum stutta áramótakveðju rétt áður en nýtt ár hefst. „Þar þakka ég landsmönnum fyrir samstarfið á árinu sem er að líða og óska þeim velfarnaðar á því nýja," upplýsir Páll.

Úvarpsstjórinn segir að á eftir áramótaskaupinu verði sjónvarpað nýlegri upptöku frá tónleikum Frostrósa í Hallgrímskirkju þar sem þær Petula Clark og Sissel Kyrkjebo eru meðal flytjenda en þær sungu fyrir fullu húsi í Laugardalshöll eins og frægt er orðið.

Stutt hlé verður gert þegar niðurtalning fyrir nýtt ár hefst og kveðja Páls flutt en svo halda tónleikarnir áfram. Í fyrra skeiðaði forveri Páls í starfi, Markús Örn Antonsson, um tónlistalíf Suðurlands á árum áður í þessu dagskrárplássi og útilokar útvarpsstjórinn ekki að framhald verði á slíkri dagskrárgerð á komandi árum þótt hún verði að víkja fyrir erlendu dívunum að þessu sinni.