Hemmi víkur fyrir Loga

„Við erum ekki að blása af Hermann Gunnarsson og Í Sjöunda himni. Logi Bergmann Eiðsson og spurningaþáttur hans Meistarinn mæta til leiks í febrúar og taka við af þættinum," segir Heimir Jónasson, dagskrárstjóri Stöðvar 2.

Orðrómur hefur verið á kreiki um að spjallþáttur Hemma yrði tekinn af dagskrá Stöðvar 2 á næstunni vegna óánægju með áhorfið og þáttinn sjálfan. Í nýlegri Gallupkönnun kom í ljós að uppsafnað áhorf á þátt Hemma er rétt um 17%

„Við ætluðum að framleiða ákveðinn fjölda af þáttum og þeir verða orðnir tuttugu í janúar. Síðan skoðum við einfaldlega framhaldið," útskýrir Heimir sem kvaðst ánægður með áhorfið á þátt Hemma og þáttinn sjálfan. Aðspurður hvort Hemmi og Í sjöunda himni færu því aftur í loftið þegar nýr meistari hefði verið krýndur hjá Loga sagði Heimir að þeir væru að skoða alla möguleika í stöðunni.

„Það er alls ekki loku fyrir það skotið að Hemmi og í Sjöunda himni mæti aftur til leiks á næsta ári," lýsti Heimir yfir.

Hermann Gunnarsson var staddur í Haukadal þegar Fréttablaðið náði í hann, en þar hélt hann upp á jólin fjórða árið í röð. Hemmi viðurkenndi að áhorfið á þáttinn hefði ekki verið í samræmi við væntingar sínar en vonaðist að stjórnendur Stöðvar 2 sýndu þættinum smá þolinmæði. „Þegar við fórum af stað með Á tali á sínum tíma rákumst við á alla veggi og hindranir sem til voru. Hrafn Gunnlaugsson, þáverandi dagskrárstjóri, sýndi okkur hins vegar þolinmæði og árið eftir vorum við komnir í sjötíu prósent áhorf," segir Hermann.

Þáttastjórnandinn viðurkennir að það hafi tekið sinn tíma að venjast því að vera með beina útsendingu frá skemmtistað en ekki í upptökuveri sem hefði verið „öruggt". „Við breyttum sviðinu aðeins og færðum viðtalssvæðið aðeins til sem gaf góða raun," segir Hermann sem hafði hafði hins vegar litlar litlar áhyggjur þótt þátturinn yrði ekki aftur á dagskrá næsta vetur. „Ég er með langtímasamning við 365 miðla og fer því bara að sinna öðrum verkefnum ef sú ákvörðun yrði tekin," segir Hermann.