Átök í Ásatrúarfélaginu

Í fyrra seldi Óttar Ottósson, nú lögréttumaður, vini sínum húsnæði Ásatrúarfélagsins úti á Granda á einhverjar 90 milljónir. Eignin er nú metin á 400 milljónir króna, segir Torfi Geirmundsson, hárskerinn góðkunni við Hlemm.

Hann hefur ákveðið að bjóða sig fram til stjórnar í Ásatrúarfélaginu. Torfi er, líkt og ýmsir aðrir innan félagsins, afar ósáttur við hvernig núverandi stjórn hefur haldið á málum. Segir reikninga ekki í lagi og upplausn í félaginu.

Eins og þeir segja stjórnmálamennirnir: Margir hafa komið að máli við mig. Ég fer fram til stjórnar til að ná friði innan félagsins. Þarna hafa verið væringar. Og þessi sala er náttúrlega skandall.

Viku áður en allsherjarþing fer fram er haldið haustblót ásatrúarmanna að venju. Í kvöld nánar tiltekið.

Það er nú haldið á Sögu en ekki í eigin húsnæði félagsins, segir Torfi og lýst ekki vel á það. Torfi segir jafnframt ýmis verk fyrir höndum í þessu trúfélagi sem nú telur liðlega þúsund manns. Meðal annars það að sparka í rassinn á borgarstjóranum Vilhjálmi Þ. Vilhjálmssyni sem hefur dregið úr hófi að taka fyrstu skóflustunguna að Hofi sem til stendur að reisa um starfsemi félagsins í Öskjuhlíð. Torfi segir að þar við hliðina standi til að reisa búddatrúarhof og segir það ekki óskemmtilegt. Búddatrúarmenn hljóti að reynast afbragðs nágrannar. En Torfa lýst þeim mun verr á að Óttar lögréttumaður sitji áfram fyrir í fleti með sinn feril og ætlar því í stjórn sjálfur.

Ekki náðist í Óttar þrátt fyrir ítrekaðar tilraunir en staðgengill lögréttumanns í stjórn er Egill Baldursson:

Þetta er náttúrlega bara vitleysa. Eignin var seld á 95 milljónir að undangengnu mati þriggja virtra fasteignasala í borginni. Enginn þeirra mat eignina hærra en þetta og þar af leiðandi töldum við þetta gott og ásættanlegt verð, segir Egill.

Hann talar jafnframt um að félagið hafi varla svo getað staðið undir rekstri á húsinu hvað þá að fara í endurbætur.

Á síðasta allsherjarþingi var tekist á um sölu húseignarinnar en Egill segir óverulegan fjölda hafi sett sig gegn henni þó vel hafi heyrst í þeim sem settu sig á móti.

Egill ætlar áfram að gefa kost á sér til stjórnarsetu sem og Óttar og vefsíðustjóri félagsins Garðar Guðnason. Ég fagna því að Torfi bjóði sig fram. Fagna hverju framboði sem kemur. Þetta eru lýðræðislegar kosningar, segir Egill sem var, þegar Fréttablaðið náði af honum tali, að búa sig undir blótið sem verður í kvöld og verður örugglega fjörugt ef af líkum lætur.