Saman á ný

Leikararnir og fyrrverandi kærustuparið Brad Pitt og Gwyneth Paltrow munu sameinast á ný á hvíta tjaldinu. Þau eru bæði búin að samþykkja að leika í mynd byggðri á ævi Richards Nixon Bandaríkjaforseta sem ber nafnið Dirty Tricks og fjallar meðal annars um Watergate-hneykslið.

Paltrow og Pitt voru saman í þrjú ár og voru trúlofuð. Síðast þegar þau léku saman í mynd var það í kvikmyndinni Seven, en þar léku þau hjón. Ekki er ljóst hver hlutverk þeirra verða í Dirty Tricks.

Þetta mun eflaust valda fegurðardísinni og kærustu Brads Pitt, Angelinu Jolie, hugarangri þar sem þau tvö kynntust á tökustað þegar Brad Pitt var enn kvæntur Jennifer Aniston. Það er því eins gott að ekki kvikni í gömlum glæðum á tökustað því nú eru börn komin í spilið. Paltrow á tvö börn með eiginmanni sínum, söngvaranum Chris Martin, og Pitt þrjú með Angelinu Jolie.