Laminn á Laugaveginum

Hinn geðþekki fréttamaður hjá NFS og Stöð 2, Kristinn Hrafnsson, lenti í heldur óskemmtilegri lífsreynslu um helgina. Maður réðst að honum þar sem hann var í mestu makindum sínum að spóka sig á Laugaveginum að næturlagi og sló til hans með þeim afleiðingum að Kristinn slasaðist í andliti.

„Engin gjörgæsla samt,“ sagði Kristinn sem vildi lítið tjá sig um málið. Kristinn kvaðst ekki vita af hverju maðurinn hefði ráðist svona að sér, þetta hefði ekki tengst vinnu hans sem fréttamaður og hann kunni engin deili á manninum, um tilhæfulausa áras hefði verið að ræða.

Kristinn hefur kært árásina til lögreglunnar í Reykjavík en var ekki bjartsýnn á að maðurinn myndi nokkurn tímann finnast. „Eins og dæmin sanna,“ bætir hann við. Ofbeldið í miðborginni hefur verið töluvert til umræðu í þjóðfélaginu og virðist enginn óhultur fyrir misindismönnum sem láta hnefana oftar en ekki tala með fyrrgreindum afleiðingum. Sjónvarpsáhorfendur mega þó eiga von á Kristni á skjáinn innan tíðar.