Brynja til liðs við Björgólf eldri

Samkvæmt heimildum Fréttablaðsins hefur Brynja Gunnarsdóttir, markaðs og þjónustustjóri hjá útgáfufélaginu Eddu, verið ráðin til starfa hjá Landsbankanum en þau hafa verið hæg heimatökin hjá Björgólfi Guðmundssyni, stjórnarformanni bankaráðs bankans, að fá Brynju yfir því hann er sem kunnugt er einn aðaleigandi útgáfunnar. Ekki er enn ljóst hvert hlutverk hennar hjá bankanum verður en Brynja og Samson - hópurinn höfðu skrifstofur hlið við hlið um tíma.

Samkvæmt heimildum Fréttablaðsins lét Brynja af störfum hjá Eddu á föstudaginn við mikinn söknuð starfsmanna en Björgólfur mun hafa hrifist svo af störfum Brynju hjá útgáfunni að hann vildi ólmur fá hana til liðs við sig.

Björgólfur hefur verið áberandi í menningarlífi landsmanna og lagt margvíslegum menningarmálum lið auk þess sem Landsbankinn hefur stutt dyggilega við menningaratburði og heldur meðal annars alltaf tónleika á Menningarnótt Reykjavíkurborgar við útibú sitt í Austurstræti og munu starfskraftar Brynju án nokkurs vafa nýtast á þeim vettvangi. Ekki náðist í Brynju vegna málsins þrátt fyrir ítrekaðar tilraunir. -fgg