Willis fékk stjörnu

Leikarinn Bruce Willis hefur fengið eigin stjörnu á frægðarstétt Hollywood. Fjölskylda Willis og vinir voru samankomin í kvikmyndaborginni til að fylgjast með athöfninni.

Meðal annars voru þar fyrrverandi eiginkona hans Demi Moore ásamt eiginmanni sínum Ashton Kutcher, Ben Affleck, Kevin Costner, Sylvester Stallone, Don Johnson og Billy Bob Thornton.

"Einu sinni kom ég alltaf hingað og skoðaði þessar stjörnur og vissi aldrei hvað ég ætti að gera ef ég fengi slíka sjálfur," sagði Willis. "Síðan eru liðin mörg ár og núna er ég loksins mættur og er ennþá spenntur. Það er ennþá gaman að vera leikari."

Willis er líklega þekktastur fyrir hlutverk sitt sem löggan John McClane í Die Hard-myndunum. Fjórða myndin í röðinni, Live Free or Die Hard, kemur einmitt út 29. júní á næsta ári.

Willis hefur einnig leikið í myndum á borð við The Sixth Sense, Pulp Fiction, Twelve Monkeys og The Jackal. Einnig lék hann í sjónvarpsþáttunum Moonlighting og hlaut Emmy-verðlaun fyrir frammistöðu sína í þeim.