Vandræðalegt slys

Keith Richards, gítarleikari The Rolling Stones, segist einungis hafa setið á trjábol en ekki verið að klifra upp í pálmatré þegar hann datt á hausinn í fríi á Fiji-eyjum í apríl. Þurfti hann að gangast undir heilaaðgerð í framhaldinu og fyrir vikið þurfti að fresta tónleikaferð Stones um Evrópu í sumar.

Mér finnst þetta dálítið vandræðalegt, sagði Richards í viðtalið við tímaritið Rolling Stone. Ég sat á þessum trjábol um þremur metrum ofar jörðinni. Ég hafði verið að synda og var blautur. Ég lenti illa, hausinn á mér fór í trjábolinn og þannig var nú það, sagði Richards. Þetta er ekki í fyrsta sinn sem ég daðra við dauðann. Ætli ég hafi ekki lært það af þessu að maður á ekki að sitja á trjám.

Rolling Stones hafa hafið seinni tónleikaferð sína um Norður Ameríku. Í þetta sinn mun sveitin ferðast til hinna minni borga.