Tekur upp Brynjólfsmessu

Brynjólfsmessa, sem er tónverk eftir Gunnar Þórðarson, verður tekið upp í Grafarvogskirkju dagana 17. og 18. október og síðan gefin út á plötu í nóvember.

Gunnar segist vera spenntur fyrir verkefninu en vill sérstaklega taka fram að Jóhannes í Bónus hafi gert þessar upptökur mögulegar. „Ástæðan fyrir því að þetta er tekið upp er út af Jóhannesi í Bónus. Hann styrkir þetta og ég er honum ævinlega þakklátur fyrir," segir Gunnar. „Það er dýrt að taka þetta upp þannig að ég hringdi bara í hann. Hann brást vel við og gerði þetta mögulegt."

Brynjólfsmessa er helguð minningu Brynjólfs biskups Sveinssonar, en í fyrra voru liðin 400 ár frá fæðingu hans. Um er að ræða latneska messu fyrir einsöngvara, kór, barnakór og hljómsveit. Að flutningi verksins hafa komið rúmlega hundrað manns úr kórum Keflavíkur-, Skálholts- og Grafarvogskirkna, auk barnakóra kirknanna og einsöngvara úr fremstu röð, þeirra Sigrúnar Hjálmtýsdóttur sópransöngkonu og Jóhanns Friðgeirs Valdimarssonar tenórs. Kammersveitin Jón Leifs Cammerata annast undirleik.