Sér eftir að hafa haldið framhjá Siennu Miller

Leikarinn Jude Law sér mikið eftir því að hafa haldið framhjá Siennu Miller. Hann segist hafa beðist afsökunar, vill gleyma atvikinu og halda áfram lífi sínu.

„Ég vildi ekki særa neinn og hef beðið alla þá afsökunar sem mér finnst skipta máli," segir leikarinn Jude Law um sambandsslit sín við Siennu Miller. Eins og frægt er batt Sienna enda á samband þeirra þegar hún uppgötvaði að Jude hafði haldið framhjá henni með fóstru barna sinna.

Í viðtali við GQ-tímaritið gerir Jude upp við þessi mistök sín. Leikarinn, sem er 33 ára, segist hafa eytt nægum tíma í að biðjast afsökunar. Hann ætli ekki að halda áfram að pína sig með sífelldum upprifjunum á þessu. „Það er í raun ekki mikið meira sem ég get sagt. Maður getur ekki hlaupist á brott, maður verður einfaldlega að taka svona mistök á sig og læra einhvern veginn að lifa með því," segir Jude.

Jude spyr í viðtalinu hvers konar manneskja myndi eyða afganginum af lífi sínu í að rifja upp mistök sem þessi. „Ábyrgðin liggur í því að sýna að maður hafi lært af þessu, halda áfram og gera þetta ekki aftur," segir Jude sem hefur aftur tekið saman við Siennu. Hann telur líf sitt aftur komið á rétta braut. „Það virðist sem hlutirnir horfi betur við mér nú og hlutirnir eru farnir að róast, bæði í einkalífinu og því opinbera. Lífið er ljúft."