Madonna ekki lögsótt

Poppdrottningin Madonna verður ekki kærð fyrir guðlast eins og búist hafði verið við eftir tónleika hennar í Düsseldorf en þetta kemur fram á fréttavef AP-fréttastofunnar.

Þýskir saksóknarar tilkynntu um helgina að þeir hygðust fylgjast grannt með tónleikum Madonnu eftir að þeim hafði borist kvörtun um að söngkonan hefði í frammi guðlast en það er lögbrot samkvæmt þýskum lögum. Madonna hefur oft hneykslað kirkjunnar menn og í einu atriðanna í þessari tónleikaferð lætur hún krossfesta sig með þyrnikórónu á hausnum.

Söngkonan vísar hins vegar öllum ásökunum um guðlast á bug. Hún segist vera að benda á eyðnivandann í heiminum en hann er hvað mestur í Afríku og er talið að yfir 25 milljónir manna séu smitaðar af veirunni, þar af tæplega tvær milljónir barna. Þýski biskupinn Magot Kaesmann sagði í samtali við Bild am Sonntag að aðdáendur dívunnar ættu að sniðganga tónleikanna.

"Ég hélt að Madonna væri betri en þetta af því hún hefur alltaf sagst vera trúuð manneskja," sagði Kaesmann í blaðinu. "En kannski er vanvirðing á trúarbrögðum eina leiðin fyrir roskna poppstjörnu til að láta bera á sér," bætti biskupinn við. "Ég biðla því til fólksins að sniðganga tónleikana því stjörnur koma og fara en kristin trú er til að eilífu." Talsmaður söngkonunnar í New York sagði atriðið ekki vera hugsað til að vanvirða kirkjuna.

Talsmaður saksóknaraembættisins í Düsseldorf, Johannes Mocken, lýsti því síðan yfir í gær að stjórnvöld í borginni hygðust ekki kæra Madonnu fyrir guðlast. "Sumum trúuðum kann að finnast atriðið móðgandi en það er ekki glæpsamlegt," sagði Mocken við fjölmiðla í gær. Poppdívan heldur næst til Hannover en engar fregnir hafa borist af því hvort stjórnvöld þar ætli að grípa til aðgerða.