Íhuga málsókn vegna björgunar

Við aðalmeðferð í máli ákæruvaldsins gegn Jónasi Garðarssyni kom fram hjá Boga Sigvaldasyni, varðstjóra lögreglunnar í Reykavík, að bátar björgunarsveita hefðu verið komnir á vettvang meira en 20 mínútum áður en lögreglan ákvað að leita eftir bátnum á hafi úti. "Við heyrðum ekkert um alvarleika málsins fyrr en við komum að fólkinu á kili bátsins," sagði Bogi fyrir dómi.

Jónína Sigurðardóttir, aðstoðaryfirlögregluþjónn og rekstrarstjóri fjarskiptamiðstöðvar ríkislögreglustjóra, segir tilkynninguna hafa verið metna miðað við fyrstu upplýsingar sem bárust. "Lögreglan í Reykjavík var með málið og ef allt er eðlilegt þá þarf lögreglan að óska eftir upplýsingum ef hún þarf þær. Erfiðast við þetta tilfelli var að erfiðlega gekk að fá staðfest hvar slysið varð."

Jóhannes Rúnar Jóhannsson, talsmaður og lögmaður aðstandenda Friðriks Á. Hermannssonar og Matthildar V. Harðardóttur sem létust í slysinu, segist fylgjast grannt með öllum þáttum rannsóknarinnar. "Þess verður krafist að sérstaklega verði farið yfir samskipti fjarskiptamiðstöðvar Ríkislögreglustjóra og Neyðarlínunnar við lögregluna í Reykjavík.

Aðstandendur hinna látnu fylgjast grannt með framgangi þessa máls en eðlilegt er að þeir vilji bíða niðurstöðu í málinu sem nú bíður dóms, áður en næstu skref eru ákveðin endanlega."