Nylon fellur um 23 sæti í Bretlandi

Loosing a Friend, fyrsta smáskífa Nylon flokksins á Bretlandi, er kominn niður í 52.sætið á breska smáskífulistanum eftir að hafa farið beint í 29.sætið í sinni fyrstu viku. Einar Bárðarson, umboðsmaðurinn stúlknanna, segir þetta þó vera ásættanlegan árangur. Við gerðum okkur aldrei vonir um neitt meira en í flestum tilvikum ná hljómsveitirnar sínum besta árangri í fyrstu vikunni, útskýrir Einar en segir jafnframt að þau hafi gert sér vonir um meiri útvarpsspilun á laginu Loosing a Friend. Úr því eigi að bæta með næstu smáskífu.

Þrátt fyrir þetta er engan bilbug á hljómsveitinni að finna því upptökustjórinn Andy Wright er væntanlegur til landsins á föstudag en þá hefjast upptökur á nýrri smáskífu. Wright hefur tekið upp alla helstu smelli Simply Red en hann fékk Grammy - verðlaunin fyrir endurkomuplötu gítarhetjunnar Jeff Beck, segir Einar sem telur að nýja lagið muni taka eitt skref til hægri. Þetta verður örlítið meira stuðlag en stúlkurnar munu þó ekki æfa einhvern dans fyrir myndbandið, ég lofa því, bætir Einar við.

Götublaðið The Sun hefur að undanförnu staðið fyrir kosningu á heimasíðu sinni um hvaða hljómsveit taki við af Girls Aloud en sú sveit er smám saman að leggja upp laupana eftir mikla velgengni á Bretlandi. Nylon og stúlkurnar í Stonefoxx berjast þar um hituna en Einar sagðist ekki hafa hugmynd um hvernig sú kosning gengi. Við vitum ekkert um þessa hljómsveit og þær vita sjálfsagt ekkert um Nylon.