Reynir skrifar bók um Rögnu

Reynir Traustason hætti sem ritstjóri Mannlífs vegna ágreinings við yfirstjórn Tímaritaútgáfunnar Fróða um stefnu blaðsins. Eins og fram kom í Fréttablaðinu í gær sagði Reynir upp starfi sínu sem ritstjóri Mannlífs en hann hefur stýrt blaðinu í hálft annað ár.

Ég var ráðinn á Mannlíf til að stýra blaðinu og fór með það vald sem fylgir því að vera ritstjóri, segir Reynir. Stjórn Fróða vill hins vegar nýjar áherslur sem ég er ekki sammála. Það hjálpar mér því að taka ákvörðun um að fara að gera eitthvað annað. Þetta er ákvörðun sem ég tek af fúsum og frjálsum vilja en með ákveðnum trega þar sem mér líkar vel við fyrirtækið og þá sérstaklega Elínu Ragnarsdóttur framkvæmdastjóra.

Reynir er sem stendur staddur í sumarhúsi fjölskyldunnar á Flateyri og hefur nóg fyrir stafni þótt hann sé hættur sem ritstjóri.

Ég er að skrifa bók um merka konu sem heitir Ragna Aðalsteinsdóttir og býr á Laugabóli við Djúp. Ragna missti dóttur sína og dótturdóttur í snjóflóðinu í Súðavík og sonur hennar fórst í snjóflóði við Óshlíð. Ragna hefur verið bóndi í fimmtíu ár og hefur verið ein með búið þar. Hún er mikil hetja og nú fæ ég tíma til að klára bókina.

Reynir segist ekki hafa sungið sitt síðasta í fjölmiðlum þótt hann hafi sagt upp starfi sínu hjá Tímaritaútgáfunni Fróða. Ég á eftir að rísa upp eins og fuglinn Fönix, segir hann hlæjandi.

Að sögn Elínar Ragnarsdóttur, framkvæmdastjóra Fróða, er óráðið hver tekur við Mannlífi en blaðið heldur áfram að koma út.