Opna fyrstu vespuleigu landsins

Fyrir nokkrum árum leigðum við vespu á Kanarí og keyrðum þá hringinn um eyjuna og þótti mjög gaman. Þannig má eiginlega segja að þessi hugmynd sé til komin, segir Jón Jónsson sem opnað hefur vespuleigu á Stokkseyri ásamt eiginkonu sinni Elsu Kolbrúnu Gunnþórsdóttur en hjónin hafa í sjö ár séð um rekstur Shellskálans á Stokkseyri og í tvö ár rekstur Shellskálans á Þorlákshöfn.

Margir Íslendingar hafa, eins og þau hjónin, nýtt sér vespur á ferðalögum erlendis en Jón segir að þær henti ekki síður á Íslandi, ekki síst á Suðurlandi þar sem mikið er um flatlendi.

Þetta er mjög skemmtilegur ferðamáti og einfalt að keyra. Vespurnar eru án gíra og því er bara gefið í og þannig er mjög auðvelt fyrir alla að keyra þær. Þetta eru ekki mjög öflug tæki en komast þó upp í 70 km hraða. Svo er líka alveg hægt að keyra vespurnar þó vegirnir séu blautir því menn eru með fæturnar á bak við hlíf á meðan þú færð gusurnar beint á lappirnar þegar þú ert á mótorhjóli, segir Jón sem býst við því að hinn íslenski ferðamaður verði duglegur við að nýta sér þennan nýja ferðamöguleika.

Til að byrja munu hjónin bjóða upp á fimm 50cc vespur af gerðinni Zip sem er amerískt merki og eru þær leigðar í lágmark tvær klukkustundir í senn. Það er afar stutt í ýmsa sögufræga staði sem gaman er að keyra til og skoða. Það er til dæmis hægt að fara í Gaulverjabæ og upp með Þjórsá, niður á Selfoss og til baka. Við ætlum að búa til gróft kort af svæðinu þar sem merktir eru inn á áhugaverðir staðir sem gaman er að rúnta til.