Anna Rakel á hvíta tjaldið

Þetta er nútímasaga sem gerist í miðbæ Reykjavíkur, segir Guðrún Ragnarsdóttir, handritshöfundur og leikstjóri nýrrar stuttmyndar sem verið er að taka þessa dagana í miðbænum. Myndin nefnist Konfektkassinn og skartar Önnu Rakel Róbertsdóttur, Pétri Einarssyni og Ellert A. Ingimundarssyni í aðalhlutverki. Myndin segir frá sambandi Önnu og Péturs en þau leika feðgin í myndinni og leit þeirra að þriggja hæða konfektkassa frá Nóa Síríus. Þetta er einstök ferðasaga sem er eins konar uppgjör í sambandi föðurs og dóttur, segir Guðrún.

Tökurnar hafa gengið vel. Laugavegurinn er í stóru hlutverki og á sunnudaginn síðasta í veðurblíðunni lentum við í smá vandræðum en þá þurftum við að stoppa umferðina um miðjan dag og reyndist það þrautinni þyngri. Það endaði með því að aðstoðarframleiðandinn þurfti að dansa fyrir bílana til að fá þá til þess að stöðva, segir Guðrún hlæjandi.

Það má segja að myndin sé eins konar fjölskylduverkefni því Anna Rakel er dóttir Guðrúnar og er þetta frumraun hennar á hvíta tjaldinu. Anna Rakel hefur um árabil starfað sem fyrirsæta auk þess að vinna í sjónvarpi svo eitthvað sé nefnt. Framleiðandi myndarinnar er Cinema Reykjavík og það er Brynhildur Birgisdóttir sem stjórnar þessu verkefni en hún er systurdóttir Guðrúnar. Myndin er tekin upp á 10 dögum og eru upptökur hálfnaðar. Guðrún býst við því að myndin rati inn í bíóhús í byrjun næsta árs.