Sjóræningjar mala gull

Sjóræningjarnir í Karíbahafinu halda áfram að láta gamminn geisa vestanhafs. Dead Man’s Chest er nú orðin aðsóknarmesta kvikmyndin í sumar samkvæmt imdb.com en hún hefur halað inn 258 milljónir eftir hálfan mánuð í sýningu. Kvikmyndin var aftur í efsta sætinu þessa vikuna og því ljóst að framleiðandinn Jerry Bruckheimer og Disney hafa enn og aftur veðjað á réttan hest. Þau Johnny Depp, Keira Knightley og Orlando Bloom eru sem fyrr í aðalhlutverkum en að þessu sinni berjast þau við sæskrímsli sem telja sig eiga rétt á sálu Jack Sparrow.

Reyndar skyggir slæm útkoma Disney-fyrirtækisins á þessar góðu fréttir en fyrirtækið neyddist til að segja upp fjölda starfsmanna vegna slæmrar útkomu. Samkvæmt talsmanni Disney, Lowell Singer, er ekki búist við því að hlutabréfin hækki neitt að ráði á næstu tólf mánuðum. Ástæða þess er sögð að sjónvarpsstöð Disney, ABC, á í miklum fjárhagsörðugleikum auk þess sem lagt var út í mikinn kostnað vegna samninga við NFL-deildina auk NASCAR-kappakstursins.