Strákarnir okkar til Bandaríkjanna

Kvikmyndin Strákarnir okkar verður frumsýnd í Frakklandi í dag en hún er nú að hefja ferðalag um Evrópu þar sem áætlaðar eru sýningar í Belgíu, Hollandi, Spáni, Noreg og Þýskalandi. „Myndin verður sýnd í fimmtán kvikmyndahúsum í Frakklandi og sex borgum í Þýskalandi,“ segir Júlíus Kemp, aðalframleiðandi myndarinnar hjá Kvikmyndafélagi Íslands. Stærsti sigur myndarinnar er hins vegar dreifing í Bandaríkjunum á næsta ári en ekki er ljóst í hversu mörgum kvikmyndahúsum hún verður sýnd þar.

Samningar um dreifingu á myndinni náðust á kvikmyndahátíðinni í Berlín en svo var gengið frá þeim á Cannes. Júlíus var að vonum ánægður með þessa dreifingu og sagði þetta allt vera á áætlun. „Við erum mjög sáttir með þessar viðtökur,“ bætir hann við. Fyrir rétt um ári greindi Fréttablaðið frá því að breskir aðilar hyggðust endurgera myndina á ensku en Júlíus hafði ekkert heyrt neitt meira af því. „Það þarf ekkert að vera að það sé dottið upp fyrir enda geta slík verkefni tekið allt að fimm árum,“ útskýrir hann.

Kvikmyndafélag Íslands framleiðir kvikmyndina Astrópíu en tökur standa yfir í Hafnarfirði um þessar mundir. Þar fer fegurðardrottningin Ragnhildur Steinunn með hlutverk stúlku sem neyðist til að vinna fyrir sér eftir að kærastanum hennar er hent í steininn. Gunnar Björn Guðmundsson er leikstjóri myndarinnar en með önnur hlutverk fara þeir Ómar Örn Hauksson og Snorri Engilbertsson. „Tökurnar ganga mjög vel en við erum um það bil hálfnaðir,“ segir Júlíus sem reiknar með að þeim verði lokið í byrjun ágúst.