Innilegt samband við stein

Nýjasta smásagnasafn japanska rithöfundarins Haruki Murakami hefur fengið ágætar viðtökur gagnrýnenda en bókin Blind Willow, Sleeping Woman geymir 26 sögur Murakamis sem skrifaðar eru á undanförum 30 árum.

Gagnrýnanda Sunday Times verður tíðrætt um annarleikann í sögum Murakamis en það höfundareinkenni hans mótaðist snemma á ritferli hans. Margar af sögunum hverfast um minningar og óstöðugar sjálfsmyndir en annarleikinn birtist á ótal vegu, eiginkona teiknara deyr og skilur hann eftir með minningar sem eru aðeins skuggar af skuggum og fólk sem á innilegra samband við steina, drauma og vindinn heldur en aðrar manneskjur. Gagnrýnandi Sunday Times segir að myndlíkingar Murakamis séu heillandi en bendir á að margar ljóðrænar myndir haldi ekki nógu vel og að skrifin séu of upptekin af sjálfum sér.

Í dómi um bókina er vitnað til orða höfundarins sem líkir smásagnagerð sinni við garðrækt en skáldsagnagerðinni við skógrækt en gagnrýnandinn klykkir út með því að litlar exótískar plöntur lifi ekki alltaf af flutninga.

Í skrifum sínum um bókina áréttar gagnrýnandi The Guardian að sögur Murakamis séu töfrandi en súrrealismi höfundarins geti orðið þreytandi til lengdar. Smásögur hans séu jafn snilldarlegar og skáldsögurnar en í smásögunum sé meira jafnvægi. Allar sögurnar í safninu beri vott um annarleikann sem höfundurinn er þekktur fyrir en í smásögunum sé tilfinning fyrir byggingu skýrari. Þær kalli fram það besta hjá höfundinum og því sé hann ekki aðeins költ-fígúra heldur fyrsta flokks smásagnahöfundur.