Akureyri undirlögð af Django

Djasstónlist kennd við belgíska gítarsnillinginn Django Reinhardt verður sífellt vinsælli um allan heim. Á morgun hefst hátíð norðan heiða þar sem arfleifð þessa einstaka manns er haldið á lofti.

Ólafur Haukur Árnason er einn af skipuleggjendum hátíðarinnar sem nú er haldin í fimmta sinn en hann er jafnframt félagi í hljómsveitinni Hrafnasparki sem sérhæfir sig í djangodjasstónlist. Meginuppistaðan á þessari hátíð er sígaunadjass sem er kenndur við Django Reinhardt en hann var uppi á fyrri hluta síðustu aldar, útskýrir Ólafur Haukur.

Á stríðsárunum varð ameríski djassinn sífellt vinsælli í Evrópu og þá fóru sígaunar að spila hann í eigin útsetningum og með órafmögnuðum hljóðfærum, einkum á gítar og fiðlu. Django Reinhardt var frumkvöðull í þessari músík en hans sérstaki hljómur var þó ekki kominn til af góðu því á unga aldri lenti hann í eldsvoða sem skaðaði vinstri hendi hans verulega. Hann fór að spila aftur á gítar sem nokkurs konar endurhæfingu en hann gat aðeins notað tvo eða þrjá fingur á vinstri hendinni og þess vegna breyttust gripin. Þá varð til þessi sérstaki blær yfir hljómum og lagalínum sem sígaunarnir hafa haldið áfram að nota en stíllinn mótaðist að vissu leyti út frá fötlun Djangos, segir Ólafur Haukur.

Á hátíðinni verður margt góðra gesta hvaðanæva að úr heiminum.

Nágrannar okkar í Skandinavíu hafa einnig fagnað djangomúsíkinni og frá Noregi ferðast ungstirnið Ole Kvernberg sem að sögn Ólafs Hauks er ekta djangofiðluleikari. Hann hefur verið að slá í gegn í Evrópu, einkum meðal unnenda djangotónlistar, útskýrir hann. Frá Svíþjóð kemur gítarsnillingurinn Andreas Öberg sem einnig heimsótti hátíðina í fyrra og ferðaðist meðal annars um landið ásamt tríóinu Hrafnasparki og var vel tekið af íslenskum áheyrendum. Öberg leikur aftur með tríóinu og fleiri gestum, svo sem Birni Thoroddsen og þýsk-íslenska bandinu Blue Brasil sem leikur suður-ameríska tónlist en forsprakki þess er harmónikuleikarinn og Bolvíkingurinn Hrólfur Vagnsson.

Ólafur Haukur segir að vegur þessarar tónlistar fari æ vaxandi, einkum í Bandaríkjunum og margir gestir komi langt að til þess að hlýða á snillingana. Það kemur líka talsvert af tónlistarmönnum til að njóta hátíðarinnar enda er hún skemmtilegur pakki fyrir þá. Þeir geta tekið þátt í þriggja daga námskeiði og hlýtt á tónleika á hverju kvöldi. Svo erum menn að hittast og spila saman. Það er stemning alla helgina á Kaffi Karolínu í Listagilinu sem verður eins konar bækistöð á meðan á hátíðinni stendur. Þangað koma menn og taka djammsessjónir á daginn og kvöldin og allir eru velkomnir að spila með.

Að sögn Ólafs Hauks hefur djangodjassmúsík ekki verið gefin út á Íslandi til þessa en tríóið Hrafnaspark stefnir á að gefa út plötu með hreinræktaðri djangomúsík fyrir næstu jól. Því geta þeir sem missa af djangolestinni um helgina hugsað sér gott til glóðarinnar.