Davíð Þór dómari í Gettu Betur

Allar líkur eru á að Davíð Þór Jónsson taki að sér hlutverk dómara í Gettu betur á komandi vetri. Davíð var sem kunnugt er spyrill í þáttunum frá 1997 til 2000 en nú þarf hann að dusta rykið af sögubókunum því hann verður einnig spurningahöfundurinn í þáttunum sívinsælu.

Þeir eru fáir sem vita það en ég hef komið nálægt spurningaþáttum áður sem spurningahöfundur og kem því ekki alveg af fjöllum. Ég var einn spurningahöfunda Meistarans í vetur, ásamt öðrum. Svo hef ég verið einn af máttarstólpunum í spurningakeppni Grand rokk, svo ekki sé minnst á spurningakeppnina Ari í útvarpsþættinum Górilla snemma á tíunda áratugnum, segir hann.

Davíð Þór segist byrjaður að undirbúa sig andlega fyrir Gettu betur og er farinn að punkta niður hjá sér hugmyndir að spurningum. En er einhver munur á spurningunum í Gettu betur og Meistaranum? Spurning er alltaf spurning. En maður þarf samt að hafa ákveðna tækni. Ég sjálfur hef alltaf meira gaman af spurningum sem reyna á ályktunargáfu og eðlisgreind frekar en beina þekkingu. Það er alltaf meira gaman að spurningu sem ekki er hægt að gúgla svarið við, segir Davíð.

Sigmar Guðmundsson verður áfram spyrill að sögn Helgu Reinhardsdóttur, framleiðslustjóra innlendrar dagskrárdeildar.