Pólverji færir út kvíarnar

Pólska matvöruverslunin Stokrotka hefur fært út kvíarnar og opnað matsölustað undir sama nafni. Matsölustaðurinn er til húsa að Hvaleyrabraut 35 í Hafnarfirði, þar sem verslunin var áður en hún er flutt í stærra húsnæði að Reykjavíkurvegi 64.

"Við byrjuðum að bjóða upp á pólskan mat í febrúar eða mars. Í upphafi vorum við með þrjú borð fyrir viðskiptavini en síðan varð þetta svo vinsælt að við urðum að flytja búðina," segir María Valgeirsson, eigandi Stokrotka. "Nú geta fimmtán manns í einu komið að borða."

Á matsölustaðnum bíður María upp á hefðbundna pólska matargerð, þar á meðal steiktar svínakótilettur í raspi, kjötbollur fylltar með sveppum, lauk og papriku, skyrpönnukökur og hálfmána með ávaxta- eða kjötfyllingu. Dýrasti aðalrétturinn er frá 600 krónum en eftirréttirnir eru á um 200 krónur.

María segir Íslendinga jafnt sem útlendinga komi til að borða á Stokrotka. "Íslendingar vilja góðan en ódýran mat sem er svolítið öðruvísi en þessi íslenski. Síðan kemur hingað fólk frá Þýskalandi, Tékklandi, Slóvakíu, Júgóslavíu og svo mætti lengi telja en pólska eldhúsið er mjög líkt þeirra."

Að sögn Maríu er Stokrotka nafn á litlu villiblómi, líku baldursbrá bara örlítið minna. "Matsölustaðurinn heitir Stokrotka eldhús en ég ætla að reyna að finna eitthvað betra nafn fyrir Íslendingana," segir María pólska.